الطوفان

ثم اني نفسي راضية

ثم اني حياتي فاضية

طب الرضا يجي منين؟!

ثم اني كنت بكذب

ثم ان الكفر يغلب

والرضا نكتة ظريفة

بالكتير تعيش يومين

ثم ان النكتة باخت

ثم ان النفس داخت

م الزهق و م الروتين

ثم ان السكة زحمة

ثم ان اليأس رحمة

لـ اللي سكتهم طويلة

وفي الأمل متعلقين

ثم تفرق ايه أعيش؟!

ثم أنا ميهمنيش..

اللي رايح واللي جي

واللي ميت واللي حي

واللي زاهد واللي عايز

واللي خاسر واللي فايز

طب يبقى أعيش لمين؟

ثم كنتي أنتي حبيبتي

ثم إني اخترتك أنتي

وأنتي مخترتنيش يوميها

أخترتي شبكة وبيت وعفش

وضل حيطة من فوقيها

عشان نغيظ الغيرانين

ثم ان العقل يخسر

ثم ان الظلم يكسر

والجنون سايق براحته

والناس بتضحك مبسوطين

ثم ان الدنيا قاسية

ثم ان الخلق ناسية

اللي ضحوا واللي ناضلوا

واللي جاهدوا واللي فضلوا

لآخر يوم من حياتهم

بالقضية مؤمنين

ثم اني عشت زاهد

ثم اني ليه أجاهد؟

واللي حضنوا القضية

أخرتها ماتو ملعونين

ثم موج البحر شادد

ثم ان السحب جامد

ومهما نسبح أو نعافر

برضه هنموت غرقانين

=====================

ثم بيفوت الأوان

ثم جيه وقت الطوفان

ثم نوح بينادي نسله

لحد آخر السلالة

الطوفان مش مايه بس

الطوفان ظلم وجهالة

واللي قالك ان النجاة

طوق الحياة..

بيخدعك

النجاة مش حد فينا

النجاة بس السفينة

هي اللي تقدر تنفعك

والسفينة مش خشب

السفينة ايمان وفكرة

لو كل اللي حوليك اتغلب

راح هتغلب انت بكرة

قالوا في الأمثال زمان

الخوف مابينجيش جبان

واللي خايف م السفينة

سهل يغرق في الطوفان